ອິງຕາມການສະເໜີຂອງກົມຊັບພະຍາກອນນ້ຳ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມໄດ້ອອກ ຂໍ້ຕົກລົງວ່າດ້ວຍການຄຸ້ມຄອງນ້ຳ ແລະ ການປ່ອຍນ້ຳເປື້ອນ ສະບັບເລກທີ 1430/ກຊສ, ລົງວັນທີ 7 ກໍລະກົດ 2023 ໂດຍມີຈຸດປະສົງເພື່ອກຳນົດລະບຽບການ, ວິທີການ, ຂັ້ນຕອນ ແລະ ມາດຕະການ ກ່ຽວກັບການຄຸ້ມຄອງຄຸນນະພາບນ້ຳ ແລະ ການປ່ອຍນ້ຳເປື້ອນ ບໍ່ໃຫ້ເກີນຄ່າມາດຕະຖານສິ່ງແວດລ້ອມແຫ່ງຊາດ ເພື່ອຮັບປະກັນຄຸນນະພາບທີ່ດີຂອງນ້ຳ ຕາມທິດສີຂຽວ ແລະ ຍືນຍົງ ແນໃສ່ຫຼຸດຜ່ອນມົນລະພິດທີ່ຈະເກີດຂື້ນ ຕໍ່ແຫຼ່ງນ້ຳ, ຊັບພະຍາກອນນ້ຳ ແລະ ລະບົບນິເວດ, ບໍ່ສົ່ງຜົນກະທົບຕໍ່ສຸຂະພາບຂອງຄົນ, ສັດ, ພືດ ແລະ ສິ່ງທີ່ມີຊີວິດອື່ນປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ. ຂໍ້ຕົກລົງດັ່ງກ່າວປະກອບດ້ວຍໝວດຕ່າງໆ ດັ່ງນີ້:

• ໝວດທີ 1 ບົດບັນຍັດທົ່ວໄປ
• ໝວດທີ 2 ການສຳຫຼວດ, ການຂື້ນບັນຊີ ແລະ ແຜນຄຸ້ມຄອງຄຸນນະພາບນ້ຳ
• ໝວດທີ 3 ການປົກປັກຮັກສາ, ການຟື້ນຟູ ແລະ ການຕິດຕາມກວດກາຄຸນນະພາບນ້ຳ
• ໝວດທີ 4 ການສຳຫຼວດ ການຂື້ນບັນຊີ, ແຜນຄຸ້ມຄອງການປ່ອຍນ້ຳເປື້ອນ ແລະ ການບຳບັດນ້ຳເປື້ອນ
• ໝວດທີ 5 ການອະນຸຍາດປ່ອຍນ້ຳເປື້ອນ
• ໝວດທີ 6 ການກວດກາວິຊາການການປ່ອຍນ້ຳເປື້ອນ, ການເກັບຄ່າທຳນຽມ ແລະ ຄ່າບໍລິການ
• ໝວດທີ 7 ບົດບັນຍັດສຸດທ້າຍ

ເຊິ່ງໃນການຈັດຕັ້ງປະຕິບັດແມ່ນມອບໃຫ້ກົມຊັບພະຍາກອນນ້ຳ, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ຂັ້ນແຂວງ, ຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ ຂັ້ນເມືອງ ປະສານສົມທົບກັບທຸກພາກສ່ວນທີ່ກ່ຽວຂ້ອງ

ໂດຍຈະມີການກວດກາຄືນບັນດາໂຄງການ ແລະ ກິດຈະການຕ່າງໆ ທີ່ຍັງບໍ່ໄດ້ຮັບອະນຸຍາດປ່ອຍນ້ຳເປື້ອນ ໃນໄລຍະຜ່ານມາ ແລະ ແຈ້ງໃຫ້ເຈົ້າຂອງໂຄງການ ຫຼື ກິດຈະການດັ່ງກ່າວດຳເນີນການຂໍອະນຸຍາດປ່ອຍນ້ຳເປື້ອນ ໃຫ້ສຳເລັດພາຍໃນ ຫົກ ເດືອນ ນັບແຕ່ໄດ້ຮັບແຈ້ງການ ເປັນຕົ້ນໄປ. ຖ້າໂຄງການ ຫຼື ກິດຈະການໃດ ບໍ່ປະຕິບັດຕາມແຈ້ງການ ຂອງຂະແໜງຊັບພະຍາກອນທຳມະຊາດ ແລະ ສິ່ງແວດລ້ອມ ພາຍໃນກຳນົດເວລາ 6 ເດືອນ ຈະຖືກສຶກສາອົບຮົມ, ກ່າວເຕືອນ ພ້ອມທັງພິຈາລະນາຖອນໃບຢັ້ງຢືນກ່ຽວກັບສິ່ງແວດລ້ອມ ແລະ ໃບອະນຸຍາດນຳໃຊ້ນໍ້າຕາມກົດໝາຍ ແລະ ລະບຽບການ.

ດາວໂຫລດ: ຂໍ້ຕົກລົງວ່າດ້ວຍການຄຸ້ມຄອງຄຸນນະພາບນໍ້າ ແລະ ການປ່ອຍນໍ້າເປື້ອນ ເລກທີ 1430/ກຊສ, ລົງວັນທີ 7 ກໍລະກົດ 2023