ມາດຕະຖານການກວດກາວັດແທກອຸນຫະພູມ ໃນສະຖານທີ່ເຮັດວຽກ

ອິງໃສ່ ຂໍ້ຕົກລົງ ວ່າດ້ວຍມາດຕະຖານສຽງດັງ, ແສງສະຫວ່າງ ແລະ ອຸນຫະພູມ ສຳລັບໂຮງງານອຸດສາຫະກຳປຸງແຕ່ງ ແລະ ຫັດຖະກຳ ເລກທີ 0168/ອຄ, ລົງວັນທີ 9 ກຸມພາ 2023. ໝວດທີ 4 ມາດຕາທີ 22 ກຳນົດໃຫ້ໂຮງງານອຸດສາຫະກຳປຸງແຕ່ງ ແລະ ຫັດຖະກຳທົ່ວໄປ ຕ້ອງໄດ້ວັດແທກອຸນຫະພູມ ເປັນປົກກະຕິ ຢ່າງໜ້ອຍ 1 ຄັ້ງຕໍ່ປີ. ແລະ ໂຮງງານອຸດສາຫະກຳປຸງແຕ່ງ ແລະ ຫັດຖະກຳສະເພາະ ທີ່ຕ້ອງໄດ້ວັດແທກອຸນຫະພູມຢ່າງໜ້ອຍ 2 ຄັ້ງ/ປີ ເຊິ່ງມີດັ່ງຕໍ່ໄປນີ້:

ໂຮງງານຜະລິດນ້ຳຕານຊາຍດິບ ແລະ ນ້ຳຕານຊາຍຂາວ
ໂຮງງານຕັດຫຍິບ, ຟອກ, ຍ້ອມ ແຜ່ນແພ ແລະ ເສັ້ນດ້າຍ
ໂຮງງານຜະລິດເຫຍື້ອເຈ້ຍ, ເຈ້ຍ, ເຈ້ຍແຂງ ແລະ ເຈ້ຍອະນາໄມ
ໂຮງງານຜະລິດຢາງປລາສຕິກ, ຢາງລົດ, ຫຼໍ່ດອກຢາງລົດ
ໂຮງງານຜະລິດແກ້ວ, ເສັ້ນໄຍແກ້ວ ແລະ ຜະລິດຕະພັນແກ້ວ
ໂຮງງານຜະລິດຊີມັງ, ປູນຂາວ ແລະ ປູນປາສເຕີ້
ໂຮງງານຫຼອມ, ດຶງ, ຮີດ ເຫຼັກ, ໂລຫະມີສີ ແລະ ອະໂລຫະ
ໂຮງງງານຜະລິດ, ຕົບແຕ່ງ, ດັດແປງເຄື່ອງມື, ອຸປະກອນ, ຊິ້ນສ່ວນ ແລະ ເຄື່ອງໃຊ້ຕ່າງໆ ທີ່ເຮັດດ້ວຍເຫຼັກ, ເຫຼັກກ້າ ແລະ ໂລຫະອື່ນໆ
ໂຮງງານຜະລິດ, ປະກອບ ແລະ ສ້ອມແປງ ເຄື່ອງຈັກ ແລະ ອາໄຫຼ່
ໂຮງງານຜະລິດ ແລະ ປະກອບເຄື່ອງໃຊ້ໄຟຟ້າ

ໂຮງງານຜະລິດ ແລະ ປະກອບລົດ ແລະ ເຮືອນບິນ
ໂຮງງານຜະລິດ, ສົ່ງ ຫຼື ຈຳໜ່າຍພະລັງງານໄຟຟ້າ
ໂຮງງານຜະລິດເສັ້ນໝີ່, ເສັ້ນເຝີ ແລະ ເຂົ້າປຽກ
ໂຮງງານຜະລິດແປ້ງມັນຕົ້ນ, ແປ້ງສາລີ ແລະ ແປ້ງອື່ນໆ
ໂຮງງານຜະລິດເບຍ, ເຫຼົ້າ, ນ້ຳອັດລົມ ແລະ ເຄື່ອງດື່ມ ອື່ນໆ
ໂຮງງານຜະລິດຢາສູບ
ໂຮງງານຜະລິດ ແລະ ປຸງແຕ່ງເຄມີ
ໂຮງງານປຸງແຕ່ງຢາງພາລາ ແລະ ຢາງອື່ນໆ
ໂຮງງານກັ່ນນ້ຳມັນ
ໂຮງງານປຸງແຕ່ງຢາປົວພະຍາດ
ໂຮງງານນຳໃຊ້ສິ່ງເສດເຫຼືອມາຜະລິດຄືນໃໝ່
ໂຮງງານຜະລິດນ້ຳສີ
ໂຮງງານທີ່ມີການນຳໃຊ້ໝໍ້ຕົ້ມນ້ຳອຸດສາຫະກຳ
ໂຮງງານຜະລິດດິນຈີ່
ໂຮງງານຖ່ານຂາວ

ການວັດແທກອຸນຫະພູມໃນພື້ນທີ່ທົ່ວໄປ ແລະ ພື້ນທີ່ການຜະລິດຂອງໂຮງງານອຸດສາຫະກຳປຸງແຕ່ງ ແລະ ຫັດຖະກຳ ຕ້ອງນຳໃຊ້ເຄື່ອງວັດແທກອຸນຫະພູມທີ່ໄດ້ມາດຕະຖານ. ເຄື່ອງວັດແທກທີ່ໄດ້ມາດຕະຖານສາກົນ ກ່ຽວກັບການປະເມີນສິ່ງແວດລ້ອມ ແລະ ຄວາມຮ້ອນ (ISO 7243) ໂດຍນຳໃຊ້ ອຸນຫະພູມເວັດບັດໂກບ (Wet Bulb Globe Temperature: WBGT) ເປັນດັດສະນີວັດແທກຄວາມຮ້ອນໃນສິ່ງແວດລ້ອມການເຮັດວຽກ (ມີຫົວໜ່ວຍເປັນອົງສາເຊ)

WBGT ໄດ້ເອົາປັດໄຈທີ່ມີຜົນກະທົບຕໍ່ຄວາມຮ້ອນທີ່ສະສົມໃນຮ່າງກາຍມາພິຈາລະນາ ໄດ້ແກ່ ຄວາມຮ້ອນທີ່ເກີດຂື້ນພາຍໃນຮ່າງກາຍຂະນະເຮັດວຽກ ແລະ ຄວາມຮ້ອນຈາກສິ່ງແວດລ້ອມການເຮັດວຽກ ເຊິ່ງຄວາມຮ້ອນຈາກສິ່ງແວດລ້ອມການເຮັດວຽກຖຶກຖ່າຍເທມາຍັງຮ່າງກາຍໄດ້ 3 ວິທີຄື: ການນຳ, ການພາ ແລະ ການແຜ່ລັງສີຄວາມຮ້ອນ ຄິດໄລ່ໄດ້ຈາກສູດດັ່ງນີ້:

WBGT = 0.7 NWB + 0.3 GT (ໃນກໍລະນີກວດກາວັດແທກໃນອາຄານ ຫຼື ນອກອາຄານທີ່ບໍ່ມີແດດ)
WBGT = 0.7 NWB + 0.2 GT + 0.1 DB (ໃນກໍລະນີກວດກາວັດແທກນອກອາຄານ ແລະ ມີແດດ)

ໂດຍ

NWB ໝາຍເຖິງ Natural Wet Bulb (ມີຫົວໜ່ວຍເປັນອົງສາເຊ) ອຸນຫະພູມຈາກເຄື່ອງວັດອຸນຫະພູມແບບປຽກຕາມທຳມະຊາດ ແທນການວັດອຸນຫະພູມທີ່ຜິວໜັງ ເຊິ່ງຖ້າເຫື່ອສາມາດລະເຫີຍໄດ້ ອຸນຫະພູມນີ້ຈະຕ່ຳກວ່າອຸນຫະພູມອາກາດ
GT ໝາຍເຖິງ Globe Temperature (ມີຫົວໜ່ວຍເປັນອົງສາເຊ) ອຸນຫະພູມຈາກເຄື່ອງວັດອຸນຫະພູມແບບໂກບ ເປັນການວັດຄວາມຮ້ອນຈາກການແຜ່ລັງສີ
DB ໝາຍເຖິງ Dry Bulb (ມີຫົວໜ່ວຍເປັນອົງສາເຊ) ອຸນຫະພູມຈາກເຄື່ອງວັດອຸນຫະພູມແບບແຫ້ງ ເປັນການວັດອຸນຫະພູມອາກາດ ເຊິ່ງຖ່າຍເທຄວາມຮ້ອນໂດຍຜ່ານການພາ

ໃນປະຈຸບັນ ເພື່ອຄວາມສະດວກໃນການກວດກາວັດແທກ ບໍລິສັດຜູ້ຜະລິດອຸປະກອນກວດກາວັດແທກດັດສະນີວັດແທກຄວາມຮ້ອນ ໄດ້ຄິດຄົ້ນເຄື່ອງມືເອເລັກໂຕຣນິກທີ່ສາມາດອ່ານຄ່າ WBGT ໄດ້ທັນທີ ໂດຍບໍ່ຕ້ອງຄິດໄລ່ຄ່າ WBGT ໂດຍການໃຊ້ສູດຄິດໄລ່. ເຊິ່ງເຄື່ອງມືວັດລະດັບຄວາມຮ້ອນ WBGT ຊະນິດທີ່ສາມາດອ່ານຄ່າ ແລະ ຄິດໄລ່ຄ່າ WBGT ໄດ້ໂດຍກົງຕ້ອງມີຄຸນລັກສະນະຂອງເຄື່ອງສອດຄ້ອງກັບມາດຕະຖານ ISO 7243

ການຕິດຕັ້ງເຄື່ອງວັດແທກອຸນຫະພູມໃນສະຖານທີ່ເຮັດວຽກຕ້ອງຢູ່ໃນລະດັບໜ້າເອິກ ຂອງພະນັກງານຜູ້ທີ່ເຮັດວຽກໃນຈຸດດັ່ງກ່າວ ໂດຍກວດກາວັດແທກໃນຊ່ວງເວລາທີ່ມິີຄວາມຮ້ອນສູງຂອງການເຮັດວຽກເປັນໄລຍະເວລາ 2 ຊົ່ວໂມງ ສາມາດເກີດຂື້ນໄດ້ 2 ກໍລະນີຄື:

ພື້ນທີ່ເຮັດວຽກມີຄວາມຮ້ອນສະໝໍ່າສະເໝີທົ່ວບໍລິເວນເຮັດວຽກ ໃຫ້ວັດແທກອຸນຫະພູມໃນຈຸດດຽວ
ພື້ນທີ່ເຮັດວຽກມີຄວາມຮ້ອນບໍ່ສະໝໍ່າສະເໝີ ໃຫ້ວັດແທກອຸນຫະພູມໃນແຕ່ລະຊ່ວງເວລາຂອງການເຮັດວຽກທີ່ມີອຸນຫະພູມປ່ຽນແປງ ຫຼື ພະນັກງານເຮັດວຽກຫຼາຍຈຸດ ໃຫ້ວັດແທກທຸກຈຸດ ທີ່ຜູ້ອອກແຮງງານເຮັດວຽກ ແລ້ວຊອກຫາຄ່າສະເລ່ຍດັ່ງນີ້:

ໂດຍ

WBGT1 = ຄ່າດັດສະນີ WBGT ທີ່ຈຸດເຮັດວຽກທີ 1, t1 = ໄລຍະເວລາສຳຜັດຄວາມຮ້ອນຈຸດທີ 1
WBGT2 = ຄ່າດັດສະນີ WBGT ທີ່ຈຸດເຮັດວຽກທີ 2, t2 = ໄລຍະເວລາສຳຜັດຄວາມຮ້ອນຈຸດທີ 2
t1+t2+t3+…+tn = 2 ຊົ່ວໂມງທີ່ມີອຸນຫະພູມເວັດບັດໂກບ (WBGT) ສູງສຸດ

ຄ່າມາດຕະຖານອຸນຫະພູມຈະຂື້ນກັບຄວາມໜັກເບົາຂອງວຽກທີ່ເຮັດດັ່ງນີ້:

ວຽກເບົາ ແມ່ນເຜົາຜານພະລັງງານບໍ່ກາຍ 200 ກິໂລແຄລລີ້/ຊົ່ວໂມງເຊັ່ນ: ການເຮັດວຽກໃນວຽກຫ້ອງການ, ຂັບລົດຍົກ, ກວດສອບຄຸນນະພາບ, ປະກອບວັດສະດຸເບົາ, ຕັດຜ້າ, ຫຍິບ, ຖັກ, ແສ່ວ, ຄວບຄຸມເຄື່ອງຈັກ, ຍ່າງດ້ວຍຄວາມໄວບໍ່ກາຍ 3.2 ກິໂລແມັດ/ຊົ່ວໂມງ ຕ້ອງມີອຸນຫະພູມບໍ່ເກີນ 34 ອົງສາເຊ

ວຽກປານກາງ ແມ່ນເຜົາຜານພະລັງງານແຕ່ 201-350 ກິໂລແຄລລີ້/ຊົ່ວໂມງເຊັ່ນ: ການຂັບລົດເຄນ, ບັງຄັບເຄື່ອງຈັກຂະໜາດໃຫຍ່, ການປະກອບວັດສະດຸທີ່ມີນ້ຳໜັກຫຼາຍ, ຈັດເຄື່ອງ, ຍົກເຄື່ອງທີ່ມີນ້ຳໜັກບໍ່ກາຍ 20 ກິໂລກຮາມ, ຍູ້ລໍ້, ລີດຜ້າ, ຍ່າງດ້ວຍຄວາມໄວແຕ່ 3.2-4.8 ກິໂລແມັດຕໍ່ຊົ່ວໂມງ ຕ້ອງມີອຸນຫະພູມບໍ່ເກີນ 32 ອົງສາເຊ

ວຽກໜັກ ໃຊ້ພະລັງງານບໍ່ກາຍ 350 ກິໂລແຄລລີ້/ຊົ່ວໂມງເຊັ່ນ: ລາກ ຫຼື ຍົກສິ່ງຂອງທີ່ມີນ້ຳໜັກຫຼາຍກວ່າ 20 ກິໂລກຮາມ, ການເລື່ອຍໄມ້, ການອະນາໄມເສດແຮ່ໃນເຕົາຫຼອມໂລຫະ ຕ້ອງມີອຸນຫະພູມບໍ່ເກີນ 30 ອົງສາເຊ

ພະລັງງານທີ່ໃຊ້ເຂົ້າໃນການເຮັດວຽກສາມາດປະເມີນຢ່າງລະອຽດໄດ້ຈາກທ່າທາງການເຄື່ອນໄຫວຂອງຮ່າງກາຍເຊັ່ນ: ນັ່ງ, ຢືນ, ຍ່າງ… ແລະ ກິດຈະກຳເຊັ່ນ: ການເຮັດວຽກເບົາ ຫຼື ໜັກດ້ວຍມື, ແຂນຂ້າງດຽວ ຫຼື ແຂນສອງຂ້າງ ແລະ ເຮັດວຽກດ້ວຍຮ່າງກາຍທຸກສ່ວນ. ເຊິ່ງຈະມີສູດຄິດໄລສະເພາະຕ່າງຫາກ

ແຫຼ່ງທີ່ມາ: